Монгол Улсын экспортын гол гарц, эдийн засгийн суурь болсон Гашуунсухайт боомт, Цагаанхад суурьшлын бүс болон нүүрс тээврийн жолооч нарын нөхцөл байдалтай Сангийн сайд Б.Жавхлан, Гаалийн ерөнхий газрын дарга Б.Асралт тэргүүтэй холбогдох хүмүүс газар дээр нь очиж танилцан, шаардлагатай чухал шийдвэрүүдийг гаргажээ.
Сангийн сайд Б.Жавхлан нүүрс тээврийн үйл ажиллагаа, гаалийн хяналтын бүсийн нөхцөл байдалтай танилцан жолооч нартай биечлэн уулзан, тэдний саналыг сонсоод Монгол улсын Засгийн газрын тогтоол шийдвэрийн дагуу баригдсан "Тайван зогсоол” цогцолборыг Гаалийн хяналтын бүс болгох шийдвэрийг гаргаж Гаалийн ерөнхий газрын дарга Б.Асралтад үүрэг чиглэл өгчээ. Ингэснээр нүүрс тээврийн машинууд нэгдсэн зогсоолд орж, нүүрс тээврээ хэвийн үргэлжлүүлэх нөхцөл бүрдэж байгаа юм.
"Тайван зогсоол" үнээ буулган чиргүүлгүй машиныг 5000, давхар чиргүүлтэй машиныг 10000 төгрөг байхаар зохицуулалтыг хийж өгсөн байна. Цагаан хадны урт дараалал, олон хоногийн дугаарлалт, оочероо алдах эрсдэл гээд олон асуудлыг Сангийн шинэ сайд соргогоор харж шуурхай арга хэмжээ авч ажиллаж байгааг жолооч нар илэрхийлж байна. Түүнчлэн Гаалийн шинэчлэлийн ажлыг эрчимжүүлэхэд Гаалийн ерөнхий газрын дарга Б.Асралт онцгойлон анхаарч ажиллаж байна. Хилээр нэвтрэх нүүрс тээврийн машины тоо нэмэгдсэн ч Цагаан хадны нөхцөл байдал улам дордож мэдэхийг жолооч нар хэлж байна. Иймээс цаг алдалгүй шуурхай арга хэмжээ авч, тууштай шийдвэр гаргах шаардлагатай энэ үед бодит нөхцөл байдалтай танилцсан Сангийн сайд Б.Жавхлан, Гаалийн ерөнхий газрын дарга Ө.Асралт нар чухал шийдвэрүүдийг гарган, асуудлыг газар дээр нь шийдвэрлэн ажиллажээ. "Тайван зогсоол" цогцолбор эмнэлгийн барилгыг бүрэн дуусган улсын комисст хүлээлгэн өгөөд байна. Одоо тус эмнэлэгт 10 мянга гаруй жолооч, иргэдэд халдварын эсрэг вакцинжуулалтыг хийж байна.
Эх сурвалж:Төр.мн
