Монгол Улс энэ онд 28.7 сая тонн нүүрс экспортолж, 1.3 их наяд төгрөгийн орлогыг төсөвт төвлөрүүлэхээр тооцоолоод байна. Оны эхний найман сарын байдлаар төлөвлөгөөний гүйцэтгэл 40 орчим хувьтай байгаа аж.
Харин 472.1 тэрбум төгрөгийг төсөвт төвлөрүүлсэн нь 55 хувийн хувийн биелэлттэй байгаа юм. Нүүрсний экспортын биет хэмжээ буурсан ч дэлхийн зах зээлд нүүрсний үнэ өссөн нь эдийн засагт эергээр нөлөөлж байна.
Өнөөдрийн байдлаар Далянийн Таваарын биржид коксжих нүүрсний фьючерс үнэ 5.61 хувиар өсөж, тонн нь 2860 юань хүрээд байна.
Наймдугаар сарын 23-нд БНХАУ-ын тал Гашуунсухайт-Ганцмод боомтоор нүүрс тээврийн автомашин нэвтрүүлэхийг 14 хоног хязгаарлах шийдвэр гаргаад байсан юм. Үүний дараа наймдугаар сарын 31-нээс PCR шинжилгээний хариу нь “Сөрөг” гарсан жолооч нарыг тээврийн хөдөлгөөнд оролцуулж эхэлсэн байна. Өнгөрсөн долоо хоногийн байдлаар тус боомтоор нийт 860 орчим автомашин хилээр нэвтэрч, 108.8 мянган тонн нүүрс гаргаад байгааг УУХҮЯ мэдээллээ.
Түүнчлэн “SXCoal”-ийн мэдээллээр Ганцмод боомтод Монголын түүхий коксжих нүүрсний үнэ 2700 юань хүрээд байна. Энэ нь жилийн өмнөхөөс 200 хувиар өссөн дүн боллоо.
Б.Батцэцэг | @battsetsegx
Bloomberg Tv
