АНУ-ын Миннесота мужийн хамгийн олон хүн амтай хот Миннеаполист буутай этгээд халдлага үйлджээ. Католикуудыг үзэн ядаж эсэргүүцсэн сэдэлтэй гэж таамаглаж буй уг гэмт хэргийн улмаас хоёр хүүхэд нас барж, 17 хүн бэртэж гэмтээд байна. Нас барсан хүүхдүүд 8, 10 настай байжээ.
Халдлага үйлдэгч Лхагва гаригийн өглөө сүмд бөөнөөрөө шашны зан үйлд оролцож байсан хүүхдүүд рүү цонхоор нь гал нээсэн байна. Тодруулбал, винтов, ангийн буу, гар буу гэсэн гурван галт зэвсэг ашиглан цонхоор олон удаа гал нээжээ. Хэргийн газраас утаа гаргагч бөмбөг мөн олдсон аж. Хэрэгтэн олон хүн буудсаныхаа дараа хэргийн газарт өөрөө амиа алджээ. Түүнийг 23 настай Робин Вестмэн гэдэг хүн байсныг сүүлд нь цагдаагийн байгууллага тогтоосон байна.
Чухам ямар шалтгаанаар халдлага үйлдсэнийг нь хараахан албажуулан тогтоогоогүй байна. Гэхдээ халдлага үйлдэх үетэйгээ давхцуулан цахим сүлжээнд нийтлэхээр нэгэн зурвас төлөвлөсөн байсныг цагдаа нар олж мэджээ.
"Энэ бол гэм зэмгүй хүүхдүүд болон шүтлэгтэй хүмүүсийн эсрэг хийсэн санаатай үйлдэл. Хүүхдүүд дүүрэн цугларсан сүм рүү буудсан нь үнэхээр ойлгомжгүй" гэж цагдаагийн ахмад Бриан О’Хара хэлжээ.
Миннеаполисын цагдаагийн газар холбооны агентлагуудын дэмжлэгтэйгээр мөрдөн байцаалтыг удирдан явуулж байна. Цагдаа нар Лхагва гаригийн 08:00 цагийн орчимд дуудлага хүлээн авчээ.
Халдлага болсон сүм Миннеаполисийн өмнөд хэсэгт байрладаг бөгөөд 5-14 насны хүүхдүүд үйл ажиллагаанд нь хамрагддаг байв. Тус сүмийн сургуульд халдлага үйлдэгчийн ээж Мэри Грэйс Вестмэн олон жилийн өмнө ажилладаг байжээ. Цахим сүлжээн дэх бичвэрээс нь харвал тус эмэгтэй 2021 онд тэтгэвэртээ гарсан аж.
