Монгол Улсын Засгийн газар, Бүгд найрамдах Беларусь Улсын Засгийн газар хооронд байгуулсан экспортын зээлийн хэлэлцээрийн хүрээнд Беларусь Улсын “МАЗ” компанийн үйлдвэрлэсэн 42 ширхэг машин, механизм тоног төхөөрөмжийн түлхүүрийг олон улс, улсын чанартай авто замын засвар, арчлалтын байгууллагад гардуулах ажиллагаа өнөөдөр болов.
Авто замын нүхэн засварын битум эмульсийн технологид суурилсан болон хосолмол ажиллагаатай тусгай зориулалтын тоноглол бүхий дээрх машин, механизм нь нийтдээ 3.3 сая еврогийн өртөгтэй ажээ.
Битум эмульсээр зам нөхөгч автомашин нь авто замын хучилтад үүсээд байгаа нүхэн эвдрэлд зарцуулах хүн хүч, хүнд машин механизмын техникийн оролцоог багасгах, технологийн үе шатны ажлын дарааллыг хөнгөвчлөх, алслагдмал бүс нутагт түргэн шуурхай хүрч, чанарын өндөр түвшин гүйцэтгэж, цаг хугацаа хэмнэх давуу талтай юм. Эдгээр шинэ машин, механизмуудыг Монгол Улсын нутаг дэвсгэрт үйл ажиллагаа явуулж байгаа засвар арчлалтын 20 байгууллагад хуваарилжээ.
