Тяньжинд хуримтлагдсан импортын 9000 орчим чингэлгийг шуурхай татан авах ажлыг “УБТЗ” ХНН богино хугацаанд зохион байгуулсан ч Улаанбаатар хотын терминалууд чингэлэг буулгах зайгүй болжээ. Ачааллаа дийлэхгүйд хүрснээс импортын чингэлэгтэй олон вагон талбай сулрахыг хүлээн өртөөний зам дээр сул зогсоход хүрээд байгаа нь төмөр замын үйл ажиллагаанд хүндрэл учруулж байгаа юм. Энэ нь иргэд, аж ахуйн нэгжүүд ачаагаа авахгүй удаж байгаагаас чингэлгийн хуримтлал үүсэж, хоосон чингэлгийг буцаах ажил удааширч буйтай холбоотой юм.
“УБТЗ” ХНН-ийн зүгээс холбогдох байгууллагуудтай хамтран чингэлгийн хуримтлалыг багасгах талаар шаардлагатай бүхий л арга хэмжээг авч буй талаараа мэдээлэв. Хоосон чингэлгийн хуримтлалыг багасгахын тулд өнгөрсөн долоо хоногт 271 хоосон вагоныг ачилтад явуулжээ. Энэ сарын 7-нд чингэлгийн терминалуудаас хоосон чингэлэг ачсан гурван галт тэрэг, 216 чингэлгийг Улаанбаатар өртөөнөөс явуулж, импортын ачаатай гурван галт тэрэг, 153 чингэлэг хүлээн авсан байна.
Эх сурвалж: www.polit.mn
