Хот, хөдөөгийн хүүхдийн сурах орчны ялгааг арилгах, тав тухтай орчинд суралцах нөхцлийг бүрдүүлэхийн тулд Улсын хэмжээнд 819 Ерөнхий боловсролын сургууль, цэцэрлэг, дотуур байрны нүхэн жорлонг шинэчилж ариун цэврийн байгууламжтай болгохоор төлөвлөж буй. 2021 онд 16 аймгийн 101 сумын 450 боловсролын салбарын барилгын ариун цэврийн байгууламж шинэчлэгдэнэ гэсэн төлөвлөгөө бий.
Энэ хүрээнд БХБЯ-ны Нийтийн аж ахуй, инженерийн дэд бүтцийн бодлогын хэрэгжилтийн зохицуулах газраас 16 аймгийн 54 сумын сургууль, цэцэрлэг, дотуур байранд суурилуулах ариун цэврийн байгууламжийн “Ажлын даалгавар” -ыг боловсруулжээ.
Ажлын даалгаврыг тухайн орон нутгийн Засаг даргаар баталгаажуулан, урьдчилсан төсөв боловсруулан Боловсрол шинжлэх ухааны яаманд хүргүүлээд байна. Ариун цэврийн байгууламжтай болгох ажлын санхүүжилтийг Эрдэнэт ТӨҮГ-аас 2021, 2022 онд нийт 100 тэрбум төгрөгний төсвийг нийгмийн хариуцлагын хүрээнд шийдвэрлэж байгаа. Харин БШУЯ сонгосон технологийн дагуу тендер шалгаруулах үйл ажиллагаа явагдах юм.
